दवं म्हणून निजलो होतो सये

त्या गुलाबाच्या पाकळ्यांवर 

साथ माझी देण्यास तू पसरलीस 

किरण सूर्याची बनून सगळ्यांवर 

 KP Always4U

शरदेच अंगण नभी सये

स्वप्नी प्राजक्ताचा गंध 

रातराणीच उमलणं जसं 

तसेच आपले ऋणानुबंध

KP Always4U

 

शुभ्र सहवास तुझा लाभला सये 

जणू अंगणी चांदण्याचा सडा

तुझं आयुष्यात येणं म्हणजे 

कोजागिरीच्या मोहक चंद्र कळा

KP Always4U

उन्मळून पडू दे आता सये

असाह्य ती विरहाची झाडं

एकच श्वास दोघांचा होवू दे

नको होवू कधीच नजरेआड 

KP Always4U

भुलवण्या माझी वाट आज सये

आभाळाने बघं  इंद्रधनू पसरला 

सप्तरंग तर माझ्यासोबत आहेत

बहुतेक तुला बघण्यास तो विसरला  

KP Always4U

नयनाच्या अथांग सागरात सये 

बघं भावनांची नाव दिसत आहे 

मावळत सूर्य हळूच निरोप देत

सोनेरी रंग विखरून हसत आहे 

KP Always4U 

प्रतिबिंब उमटले बघं नयनात सये

मिठीत कसे दोन जीव विसावले 

दिसता मिलनाचा रम्य सोहळा 

सूर्यानेही  तेज स्वतःचे  लपवले

KP Alaways4U

निळ्या आभाळाचं या काळ्या धरतीवर प्रेम 

पावसाच्या रूपाने नेहमी जात असते उतू,

कुणीच म्हणून नये पावसाळा याला सये

हा तर त्यांच्या निर्मळ  मिलनाचा ऋतू  

KP Always4U

चांदण्याची टीम टीम आहे ती सये

रांगोळीचे ठिपके काढलेस तू नभी ?

डाग म्हणतात ज्याला चंद्रावरचा तो

तुझ्या गालावरची तर नाही खळी ?

KP Always4U

काही रंग सांडले आहेत बघं  सये

हातावर प्रेमाच्या फुलपाखराचे, 

विश्वासाच्या कुंचले घेवून मला  

आपले आयुष्य आहे रंगवायचे

KP Always4U

अंधारलेल्या आहेत जरी वाटा सये

माझा माझ्यावरती भरवसा आहे 

काळोख चिरत येतो सामोरी जो  

बघ मी तोच तर "कवडसा" आहे

KP Always4U 

अंधकार असतो जेव्हा प्रश्नांचा सये
तेव्हाच तुझ्या प्रेमाचा होतो प्रकाश
वाटते परक्या सारखं या जगी मला
तेव्हा तुझ्या आधाराचे दिसते आकाश

वाऱ्याने मारली टपली  तिला सये

अन ओढणीने जमिनीवर घेतली धाव

सावरत स्वतःला लाजली ती नकळत 

   नजरेनेच हृदयावर करून गेली घाव ....

KP Always4U

का रूपावरून ठरवता सये
नेहमी सौंदर्याच्या परिभाषा
चारित्र्याचे शिंपले न बघता
का बाळगावी मोत्यांची आशा ?

KP Always4U

अवघड आहे तिला समजणे सये
दिसता मी लगेच मौन धरते
शब्द शस्त्र पारंगत जरी मी
निशब्द राहून माझा पराभव करते

KP Always4U

चिंब चिंब रोम भिजवण्यास सये
पुरेशी प्रेमाच्या ती एकच सर
नाहीतर हि मुसळधार पावसात
कोरडेच असतात इथे पुष्कळ ...

KP Always4U

आज ही स्मरणात शेवटची ती भेट सये
हसत हसत ती निरोप देत होती मला
काही प्रश्न सोबत ठेवून स्वतःच्या तर
काहींची उत्तरे शोधण्यास तिने सोडले मला


KP Always4U

आसवांशी तूच माझं सये
कधी वैर दिलं होत करून
फितुरी मीच केली वाटते
येतात ते रोज वैर विसरून


KP Always4U

पाहिलंय मी त्या ज्योतीस सये

कुणासाठी तरी जळत असते ती

प्रकाशित होतात अव्यक्त भावना

तरी अर्थ तयाचे टाळत असते ती ?

समजत असतं तिला संपतेय सारं

तरी वाटेवर का त्या धावत असते ती

उमजत नाही सार तिच्या कर्तव्याचे की

कुणाला दिलेलं वचन पाळत असते ती ?

काहूर उठत असेल तिच्या ही मनी

दिसते कधीतरी घुटमळत असते ती

मंदावला प्रकाश आरोप होतो तिच्यावर

कुणासाठी हे सर्व दूर सारत असते ती ?

मंदावत जाते शेवट येतो जवळ तिचा

तरी का जगण्यास धडपडत असते ती

बाकी काय उरते ओंजळीत तिच्या ?

कुणासाठी हे आयुष्य सांडत असते ती ?

KP Always4U

एक अनामिक

एक अनामिक मला म्हणाला सये
का रे विरहाचे शब्द खेळ करतो ?
मी म्हटलं काही नाही भावा असंच
आसवे पुसायला या शब्दांचा पदर धरतो ..

एक अनामिक मला म्हणाला सये
का रे ती का सोडून गेली तुला ?
मी म्हटलं काही नाही भावा असंच
मीच तुटलेल्या फांदीवर बांधला झुला

एक अनामिक मला म्हणाला सये
का रे तिची भेट कधीच नाही होणार ?
मी म्हटलं काही नाही भावा असंच
मीच कधी तिच्या वाट्याला नाही जाणार ..

एक अनामिक मला म्हणाला सये
हे काव्य आणि लिखाण कुणासाठी ?
मी म्हटलं काही नाही भावा असंच
शब्द संपती हि तिनेच दिली माझ्या ओठी

एक अनामिक मला म्हणाला सये
अर्थ काय असतो तुमच्या या सयेचा
मी म्हटलं काही नाही भावा असंच
तो फक्त शब्द नाही आहे अर्थ निर्मळ मायेचा
तो फक्त शब्द नाही आहे अर्थ निर्मळ मायेचा

KP Always4U

पाऊस हा आठवणीचा सये

का या सरी संगे राहत नाही .

निघून जातात जश्या त्या सरि

का त्यांच्यासवे हा वाहत नाही?

भिजतात पापण्या कधी तर

कधी हास्य हि चमकते गालावर

गुमानी हा पाऊस का नेहमी

नाचवतो त्याच्या तालावर?...

आज म्हटलं विचारावं त्याला

का रे छळ मांडतोस या जीवाचा

तोच पलटून माझ्यावर बरसला

सांग यात दोष आहे कुणाचा?

मी तर माझं काम करत असतो

खेळ तुमच्याच मनाचे मांडत असतो

तुम्हीच जेव्हा कोरडे होता माझ्याविना

मी तेव्हाच तुम्हाला भिजवत असतो ...

एवढंच सांगून तो परत निघून गेला

मी मात्र उभा तिथेच चिंब भिजलेला

आज कधी नव्हे तो एकाकी जीवाला

त्याच आठवणीच्या पावसाचा आधार वाटला .

त्याच आठवणीच्या पावसाचा आधार वाटला .....